بتاريخ 22/3/2018 بحسب توقيت الدماء في الغوطة الشرقية

انتشرت على مواقع التوصل صورة لامرأة مصابة ومرمية على الأرض في شوارع الغوطة بمدينة دوما ،إثر قصف المنقطة من قبل ميليشيات الأسد وروسيا

كتبت خلود ابنة صاحبة الصورة بعد مشاهدتها لصورة والدتها التي ضجت بها مواقع التواصل .

كنت ماشية بالطريق شفت وحدة مرمية بالشارع اجيت لشيلا لك هي امي ياعالم امي
ماقدرت شيلا اللي منعني شاشة الموبايل .
صرخت عليها لتفيق لك ليش نايمة بالشارع قومي بنيمك بقلبي
ما كانت ترد
للوهلة الاولى. احترقت على نومتا
بعدين حسيتا غرقانة بالنوم ومرتاحة
هالمرة فرشت الرصيف وتلحفت السما ونامت ع انغام الصواريخ والطيران
تلات سنين كانت تعطيني امل بشوفتا .. بس اخر مرة صارت تبكي وتقلي ماعاد شوفكون قامو القيامة عنا

اختنقت وغصيت وقلتلا مبلا منلتقا بس انتي ادعي مشااان الله دعاءك مستجاب لانك نضيفة كتير من جوا ومن برا
كانو قذايف الغدر سابقيني لقلبا ضمت طاسة اللبن ونامت
بكل دوما ما كان في لبن كيف قدرتي تلاقي يا نور عيوني
كيف قدرتي تتركينا وتروحي ع طول كنتي تقولي ما بتركون وبمشي ليش هيك يا نور روحي انتي
لو تعرفي اديه طلع عندك محبين وناس ترحمو عليكي
لا تلومو امي لانو ضلت بأرضا لومو المجرم اللي قتلا
لا تقلولي ليش ما طلعت وجهو اصابع الاتهام للقاتل
تركو الضحية تنام بسلام بعيد عن حقدكون
ماقتل امي داعش ولا نصرة ولا جيش حر
قتلها صاروخ من عسكري كانت امي بيوم من الايام تقللنا لا تدعو عليه عندو ام بيحترق قلبا
يا امي انا بدي ادعي عليه وعلى كل حدا شارك بقتلك
بدي ادعي عاللي فرحانين بالنصر ع دمك
بدي ادعي ع قادة الفصائل اللي ما توحدو
بحبك كسرتي ضهري بغيابك لا تتأخري علينا ناطرينك يا نورنا يا لمّة العيلة
دبحتك بغربتي .. بس انتي دبحتيني بفقدانك فراقك دمرني
انتي هلء عند ربك ما حدا بيقدر يظلمك
انا فخورة فيكي

Kholoud Srieh